Puartâ il patrimoni culturâl simpri plui dongje dal Friûl e dai furlans

Puartâ dongje simpri di plui il patrimoni culturâl de Societât Filologjiche al Friûl e ai furlans. Al è chest, in struc, il messaç fondamentâl de assemblee de Societât che si fasarà domenie ai 5 di Març a lis 10.30 a matine in Palaç Mantica, sede di Udin in vie Manin 18.L’apontament cu la assemblee al è un moment impuartant par fâ un belanç, no dome economic, da la ativitât dal sodalizi ma al è ancje une ocasion par mostrâ ai socis, e plui in gjenerâl a la comunitât furlane, lis iniziativis che la Filologjiche e à puartât indevant tal 2022 e chês in program pal 2023.Tai ultins agns la nestre storiche istituzion culturâl si è impegnade par meti a disposizion dai furlans contignûts simpri plui multimediâi, sedi par cui che al è a stâ in Friûl ma ancje pes comunitâts tal forest. In cheste prospetive, par esempli,  si inricjìs simpri di plui il sît des Rivistis Furlanis (www.rivistefriulane.it): tal 2022 si son zontâts i “Studi Goriziani” e tal 2023 e jentrarà ancje la riviste “Bisiacaria”. Ma a incressin ancje i fonts fotografics (cu lis fotografiis dal cjapitani Oreste Bugni su la Vuere Grande tal Gurizan, chês di Pellis a Flumisel, il font da lis cartulinis e no dome), i documentaris etnografics (cul font des ricercjis etnografichis Ciceri Pellis) e si è daûr a digjitalizâ inmò di altris articui e publicazions che a saran cjamâts cui catalics in linie de Societât. Dutis chestis iniziativis a son dentri de propueste di fâ sù “vetrinis digjitâls” che a sedin a disposizion ancje des altris istituzions culturâls furlanis che a podaran cjatâ tai catalics de Filologjiche une vetrine, apont, par fâ cognossi al public chest grant patrimoni. In plui di meti a disposizion il so patrimoni culturâl, la Societât Filologjiche e je impegnade ancje inte produzion di contignûts gnûfs: tra chescj, i cors di formazion a distance pai docents des scuelis furlanis, organizâts dal Docuscuele (Centri di Documentazion Ricercje e Sperimentazion Didatiche pe Scuele Furlane), e pal public in gjenerâl, cui cors pratics di lenghe e culture furlane che a viodin incressi simpri di plui interès e partecipazion.No dome, la assemblee e sarà ancje la ocasion par presentâ ai socis lis gnovis peadis a la aplicazion de normative sul Tierç Setôr: di fat, dopo di un percors lunc e complès, la Filologjiche e je jentrade intal Regjistri unic nazionâl dal Tierç Setôr. Propit in atuazion des normativis sul no profit e dai risultâts une vore bogns, chest an la documentazion de assemblee si inricjìs di un document gnûf: il Belanç Sociâl, un imprest fondamentâl pe “rendicontazion” no dome economiche e finanziare des ativitâts de Societât.Cun di plui, in assemblee si presentaran i apontaments pal 2023: tra chescj, la edizion numar 10 de “Setemane de Culture Furlane”, che chest an si davuelzarà dai 18 ai 28 di Mai e si sierarà cu la tradizionâl “Fraie de Vierte” a Prepot, e il Congrès sociâl, che al sarà il numar 100 e si lu fasarà a Montreâl domenie ai 15 di Otubar. Ai 23 e 24 di Novembar in Cjasa Ascoli a Guriza si fasarà la cunvigne “I 150 anni dei Saggi Ladini. Il pensiero di Graziadio Isaia Ascoli tra storia e attualità”: al sarà il prin apontament di un program trienâl di cunvignis tal Gurizan in preparazion dal grant apontament pe Capitâl Europeane de Culture 2025.