Cultura
stampa

Peraulis dongje il fogolâr

A la scuvierte dai atlants linguistics

Parole chiave: Società Filologica Friulana (8)
Peraulis dongje il fogolâr

Inte suaze de Setemane de Culture Furlane 2020, vinars ai 23 di Otubar a lis 11, e vignarà screade la mostre "Peraulis dongje il fogolâr. Piccolo Atlante Linguistico Friulano" rincurade di Gianfranco Ellero: une mostre che nus compagne a la scuvierte dai atlants linguistics, impuartants imprescj di cognossince dal complès mosaic da lis nestris fevelis.
Il studi da la lenghe furlane e da la pluralitât da lis sôs variants al è un dai plui impuartants impegns che la Societât Filologjiche Furlane si è cjapade sù tai agns. Scomençant di cuant che l’Istitût al è stât fondât, ven a stâi tal Novembar dal 1919 a Gurize, pardabon tancj e di cualitât a son stâts i progjets che a àn promovût la ativitât di racuelte dal patrimoni straordenari di culture, savê fâ, tradizions e memoriis da la nestre int, patrimoni che di lui il lessic da la lenghe furlane al è espression vivarose.
Une biele ocasion par tornâ a scuvierzi chescj struments di cognossince e ven fûr di cheste mostre e dal so catalic, che a metin insiemi la ilustrazion di concets dal lessic fondamentâl da la lenghe e il furniment fotografic che al compagne il lavôr dal dialetolic, a vuelin jessi un ringraciament di rispiet a lis capacitâts, a la costance e a la inteligjence dai ricercjadôrs che a àn savût indagâ, sul teritori, i tesaurs che si platin dentri da lis peraulis.
Chescj tesaurs e chestis peraulis, un timp passâts di gjenerazion in gjenerazion "dongje il fogolâr", il lûc plui impuartant da la cjase, a van consegnâts ai plui zovins par lassâur la ricjece di une identitât che cul cjâf alt e sa lâ incuintri ai cambiaments e a lis novitâts che la storie da la nestre tiere simpri e propon.
La Societât Filologjiche e poie e colabore cun convinzion a la straordenarie imprese di gjeolinguistiche dal Atlante linguistico italiano (ALI), un monument ai dialets da la nestre penisule che nol murarà mai e che al à vût come protagonist Ugo Pellis, za president dal Sodalizi in cjarie fin al 1923. Tra il 1925 e il 1943 Pellis al finì 730 da lis 1.065 inchiestis dal ALI che a jerin stadis programadis da la Universitât di Turin: chês altris a forin puartadis indenant dopo da la Seconde Vuere Mondiâl di altris linguiscj e, dai agns Novante dal Nûfcent, al è stât pussibil publicâ i risultâts in grancj volums tematics (il cuarp uman, il cîl…): il volum plui resint, publicât di bande dal Istitût pal Atlant Linguistic Talian, tal 2019, al rapresente il lengaç dialetâl da la socialitât e, soredut, di un lûc carateristic, la ostarie. Invezit, la part furlane da lis inchiestis dal Pellis, completade cun gnovis ricercjis, e fo doprade di Giovan Battista Pellegrini tai agns Sessante par dâ vite al ASLEF (Atlante Storico Linguistico Etnografico Friulano), il prin atlant linguistic regjonâl d’Italie. Al è duncje di oblic divulgâ il plui pussibil i risultâts di cheste grande fadie e par chest a son stâts improntâts la mostre e un librut che a spieghin la ricercje linguistiche e la ricercje fotografiche di vuê, indispensabil par fâ tacâ la peraule cul ogjet che i corispuint.
La buinore de scree e vignarà insiorade ancje da la presentazion dal bust in zes di Graziadio Isaia Ascoli ta la sô gnove colocazion in cjase Ascoli, in graciis di un acuardi cu la Biblioteche Statâl Isontine. Opare di Alfonso Canciani, al è il studi pal bust in bronç che si cjate tai Zardins dal Cors. La opare e rive in cjase Ascoli par interessament dal diretôr Marco Menato, diretôr da la Biblioteche, che i va il nestri agrât. Un grant agrât ur va ancje al Comun di Gurize, a la Regjon Friûl Vignesie Julie e a la Agjenzie Regjonâl pe Lenghe Furlane par la lôr poie.

© Voce Isontina 2019 - Riproduzione riservata
Peraulis dongje il fogolâr
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.