Cors di Furlan
A son viertis lis iscrizions a la edizion 2019/2020 dai cors pratics di lenghe furlane, promovûts da la Societât Filologjiche Furlane cu la poie da la ARLeF - Agjenzie Regjonâl pe lenghe furlane.
I cors a laran indevant par tredis incuintris di dôs oris ognidun, un par setemane, par un totâl di 26 oris.
Tai cors pratics si studiin la gramatiche e la grafie da la lenghe furlane, cun chê che di lei e di scrivi simpri di plui in marilenghe. Si fevele ancje dai aspiets storics, culturâi, leteraris e da lis tradizions popolârs. Lis lezions a son a gratis e viertis a ducj i interessâts; al pues partecipâ ancje cui che nol à za une cognossince di base dal furlan. A la fin al vignarà consegnât un atestât di frecuence a chei arlêfs che a varan partecipât a almancul il 70% da lis oris di lezion.
L’atestât al è titul culturâl par jentrâ te Liste regjonâl dai insegnants cun competencis di lenghe furlane.
A Guriza si tache joibe ai 30 di Zenâr, a lis 6 sotsere in cjasa Ascoli, gnove sede da la Societât Filologjiche in vie Ascoli 1. Il docent al sarà il dot. Gianluca Franco. Te prime lezion e sarà la presentazion dal Numar Unic “Friûl”, par cure di Andrea Tilatti.
Tal Friûl di soreli jevât e te Basse a son in program ancje cors a Aquilee, Monfalcon, Sarvignan e Visc e i oraris si puedin viodi sul sît internet www.filologicafriulana.it. Simpri dal sît (sezion Lenghe furlane - Cors pratics) si pues discjamâ la schede di iscrizion. Par notâsi e par domandâ informazions, telefonâ o scrivi al Ufici Formazion da la Filologjiche (tel. 0432 501598 int. 3, formazione@filologicafriulana.it).
