Cultura
stampa

Un sium american

Racconto - 11 settembre 2001/11 settembre 2018

Parole chiave: 11 settembre 2001 (1), New York (1), Twin Towers (1)
Un sium american

Daniela e veve a pene let la mail che tant e spietave e i pareve di svolâ, e jere lade di corse a cjase par trasmeti chê gnove a la sô famee.
- Diu al esist, Diu al esist! E ripeteve di bessole intant che e vuidave la machine e la strade i pareve in chê sere plui lungje pe presse di rivâ.
I siei no vevin cjapât cul stes entusiasim la gnove, ma jê e saveve che nuie le varès fermade. Si sintive aromai parone de sô vite, a pene terminât i studis universitariis e saveve che e doveve realizâ il so sium di lâ in Americhe e in particolâr tai Stâts Unîts, precisamentri a New York.
E veve cirût i contats juscj par rivâ a otignî un contrat di lavôr cuntune impuartante societât editoriâl stant che e jere laureade in Lenghis e Leteraduris Forestis e e veve fat une tesi su la leteradure amerecane e par chest e sintive che i siei studis le puartavin là. E jere za stade tai States, a Tucson, par studiâ i Natîfs de Americhe che a jerin clamâts intun tiermin gjeneric Indians ma si tratave parplui di Aborigjens, Amerindos, Indigjens.
E veve cjatât une sistemazion ca di une coleghe di lavôr che i veve dât une cjamare tal so apartament. Alba e jere stade subit disponibil a judâle tal prin moment di ambientazion. Daniela si rindeve cont che in chel an e veve passât  dut il travai par decidi di partî e saveve che frontâ la situazion cun dutis lis dificoltâts relativis le veve gambiade forsit plui che in dute la vite, le veve maduride e cumò si sintive plui fuarte di stâ in pîts dibessole.
Alba e jere deventade par jê une amie preseose, in chel moment delicât che e stave passant. La sô vuide tal laberint de metropoli e vêle par jê e jere une fortune .
E jere lade ator par cognossi lis atrativis che la citât e presentave. Prin di dut e veve notât un aspiet che le definive sì come une citât di élite internazionâl ma tal stes timp là che la opulence e la puaretât si messedavin ma tant plui cheste ultime e lassave un sens di amarece e risaltave ancjemò di plui.
Insumis a N.Y. jessi puars al jere tant piês che in altris localitâs amerecanis  o ben chê citât no jere adate a ducj e presentave prospetivis e zonis diferentis, un mont intune megalopoli mondiâl là che il cûr al jere Manhattan cui siei gratacîi di uficis di afârs e servizis imobiliârs e di finance.
Cuant che di lontan e cjalave la statue de Libertât e provave une fuarte emozion che in chel moment e varès volût condividi cun cualchidun, chel sens di libertât che ti fâs sintî cuasi paron dal mont cence pôre di frontâ une gnove aventure.
Si sintive in chê metropoli come intun sium, la vastitât des sôs stradis che si incrosavin, i gratacîi che a tocjavin il cîl, in chê atmosfere si sintive plui vive, e veve come un fûc dentri. E jere sole li, protagoniste di chê aventure, la citât le veve inglutide e jê si sintive prisonire di chel incjant.
Une matine jê e Alba si vevin imbarcjât sul traghet da la bancjine di Battery Park par lâ a visitâ chê isule che e vignive clamade "La Isule des Lagrimis".
Daniela e cjalave chel mâr, chel sbrendul di Ocean Atlantic che al jere deventât un simbul di dolôr, di disperazion ma ancje di sperance par tante int.
Ellis Island "La Isule des Lagrimis" e jere stade la cjase - preson di prime ospitalitât par miârs e miârs di emigrants, une stazion di smistament là che a vignivin controlâts e regjistrâts.
Il timp a New York al svolave, il lavôr le impegnave une vore ma e jere sodisfate de biele esperience che e stave fasint, dal so ufici al 20 im. plan e mirave dut il panorame devant di jâ, di front in lontanance lis Twin Towers che a risaltavin su lis altris costruzions dal World Trade Center pe maestositât architetoniche.
Une dì che no dismentearà plui, propit chê dal 11di setembar dal 2001, jê si cjatave propit là in chel infier e dut al jere restât scolpît par simpri te sô memorie.
Come par solit e veve cjalât il panorame di front di jê e a jerin su par jù lis 8 e 40 minûts cuant che si veve presentât devant dai voi chel spetacul teribil che al jere cuasi ireâl se nol fos pal grant bot seguît di une esplosion che e faseve tremâ il palaç come se al fos un taramot. La sene che si presentave e pareve cuasi fantastiche come une sene di un film, un areoplan che al centrave la tor a nord des Twin Towers.
Il bot e lis esplosions a vevin fat tremâ ancje lis costruzions ator che a fasevin  part dal World  Trade Center cui siei siet edificis. Il palaç là che jê e lavorave al jere chel plui distant dal lûc dal disastri, ma i veris dai lastrons de vetrade dut ator a tremavin e a sglinghignavin.
Di istint a jerin lâts di corse iù pes scjalis di sigurece, no si capive ben ce che al stave sucedint.
Fûc, flamis e un fum neri penç intun nûl che no lassave respirâ.
Si sintive urlis, la int che e sberlave, personis che a vignivin urtadis e no rivavin a cori pal panic e la pôre che ju paralizave. Lis puartis che no si vierzevin e lis lûs che si distudavin e i assensôrs che si blocavin cu la int restade dentri.
Si sintivin lis sirenis di emergjence e i pompîrs che a corevin par cirî di distudâ il fûc che si spandeve dulintor. Cuant che a jerin rivâts ai prins plans , za viers la salvece, al jere stât il secont bot trement, in chel moment e jere stade colpide ancje la tor a sud che e crolave come la prime.
Dopo e jere stade assistide come tancj altris che a jerin rivâts a metisi in salf.
A pene che e veve podût e veve clamât a cjase par visâ che e stave ben. In Italie a jerin cirche lis cuatri dopomisdì, i veve rispuindût sô mari.
- Daniela ce gust sintîti, cemût vadial su lavôr?"
- Mame - I diseve jê cuntun fîl di vôs - Va a vierzi la television.-
- Ma le ai a pene sierade cumò - I rispuindeve jê candide.
- Ma vierzile indaûr! - E insisteve Daniela.
Sô mari e jere lade a cjalâ sul stes canâl di prin e a mostravin  simpri chê sene là che a colavin lis Tors di New York e le davin par ducj i canâi de television. Duncje si veve convint che chê no jere une sene di un film come che e veve crodût intun prin moment, ma che al jere dut vêr. Un disastri impensabil e oltri ogni imagjinazion.
Alore sô mari e veve scomençât a berlâ.
- Diu, Diu! E le clamave e voleve savê dut e jessi sigurade che la sô frute e stave ben, che e jere sane e salve.
Alba e jere stade fortunade par vie che propit chê matine e veve domandât un permès e no jere lade in ufici. A pene che a jerin tornadis a une cierte normalitât a jerin ladis a preâ e a ringraciâ il Signôr par vêlis risparmiadis ancje se a savevin che nuie al sarès stât plui come prime. Chê feride tremende che e veve patît la citât e jere restade ancje dentri di lôr par simpri. Ancje dopo cuant che a vevin costruît la Freedom Tower a Ground Zero al jere come se a vessin volût taponâ cuntune bende chê feride ancjemò vierte, chê mostruose cicatrîs. Ma Daniela e veve ancjemò devant dai voi chê sene teribil, personis che a svolavin jù dai gratacîi come uceluts spaurîts tun cîl di fûc e flamis. No jere plui lade sul puest, no veve la fuarce di lâ a lei chel memoriâl cun ducj i nons dai muarts in chê tragjedie che e veve colpît tancj nocents.
Si domandavin ancjemò il parcè di tant acaniment, un atentât teribil tal cûr de citât universâl, cosmopolite ,un simbul di convivence e rispiet des culturis, des lenghis, di etniis, un esempli unic tal mont.
Purtrop tancj, miârs di personis a jerin sparidis, imberdeâts dentri chel maçalizi di fûc, polvar di ciment, fum neri che al scjafoiave. Daniela e ringraziave simpri Diu di jessi scjampade a chel destin crudêl.
La realtât e veve superât  la fantasie, il so sium al jere deventât un vencul che al veve il senari di une citât, atrative universâl là che la finzion di un destin di distruzion come in tancj films e jere deventade realtât te sô imense tragjedie e dramaticitât.

© Voce Isontina 2018 - Riproduzione riservata
Un sium american
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.