Cultura
stampa

Gurize in prin plan par la Fieste de Patrie dal Friûl

Lis ativitâts da la Societât Filologjiche Furlane a van indevant fin ai 11 di Avrîl

Parole chiave: Fieste de Patrie dal Friûl (1)
Gurize in prin plan par la Fieste de Patrie dal Friûl

Domenie Gurize e ospitarà la Fieste de Patrie dal Friûl, une fieste par promovi la identitât furlane, in ricuart da la bole che tal 1077 e ricognossè la autonomie dal Stât patriarcjâl furlan. Une sielte che e fâs stât suntun aspiet fondamentâl da la origjin di Gurize, o sei il fat che il destinatari, o miôr un dai doi destinataris, da lis donazions disponudis di Oton tierç cul diplome dai 28 di Avrîl dal 1001 al fo il Patriarcje di Aquilee. Gurize e jentre duncje ta la storie in diret rapuart cu la istituzion religjose - che si consinti il tiermin - mari dal Friûl: il Patriarcjât aquileiês.
A son propit i rapuarts tra Gurize e il Patriarcjât ancje dopo dal 1420, an che il Stât Patriarcjâl al piert lis sôs funzions temporâls e al reste sicu istituzion religjose, che a costituissin il prin e inecuivocabil segn da la identitât di viodudis no dome religjosis tra Gurize e il Friûl centrâl: doi svilups in part diviers dal pont di viste storic, ma leâts midiant di cheste istituzion politiche e religjose superiôr a divisions politichis e nazionâls. E propit par chest al è just e al va ben che ta la citât su la rive dal Lusinç si fasedi cheste fieste: par rimarcâ che la identitât furlane e je une des componentis fondamentâls da lis sôs identitâts plurâls, dut une cun chê slovene e, fin a cent agns indaûr, cun chê todescje. Une identitât pardabon europeane.
La Societât Filologjiche Furlane, che propit a Gurize e je nassude cent agns indaûr, e à volût fâ rispiet a cheste identitât plurâl vierzint lis manifestazions cu la presentazion de Cjarte Toponomastiche dal teritori dal Comun di Gurize in trê lenghis: talian, furlan e sloven. Un lavôr che al è stât pardabon preseât e che al à viodût une grande partecipazion di int, vinars ai 22 di Març ta la sale dal Centri Civic di Lucinîs.
Un altri biel apontament par valorizâ la lenghe furlane al è chel di lunis ai 8 di Avrîl. A lis 6 sot sere, li da la sale Dora Bassi, a vignaran presentâts i ultins doi volumuts da la golaine "Strumenti" de Filologjiche: Rispietìn la marilenghe di Gotart Mitri, che al propon cualchi resonament sul ûs dal furlan te nestre comunitât, par capî miôr la fuarce espressive de nestre lenghe e il sens de sô trasformazion; e Ortografie furlane. Lenghe comune e varietâts locâls di Paolo Roseano e Anna Madriz, une vuide che e presente lis regulis ortografichis dal furlan e che e jude a scrivi la marilenghe, ancje ta lis varietâts locâls. A la presentazion a saran presints i doi autôrs, Mitri e Madriz, moderâts dal professôr Rienzo Pellegrini.
Ma grande atenzion la Filologjiche e à volût puartâ ancje al mont da la scuele. Ve che alore, il Docuscuele - Centri pe documentazion, ricercje e sperimentazion pe scuele furlane al à inmaneât GO GO GO: trê seminaris formatîf ta lis scuelis dal Friûl di Soreli Jevât, ogni joibe da lis 17.00 a lis 19.00. Il prin a si è davuelt li dal I.C. Gurize 1 ai 28 di Març, cuntune lectio magistralis dal professôr Franco Fabbro de Unviersitât dal Friûl sul cerviel plurilengâl. Si larà indenant ai 4 di Avrîl li dal I.C. di Cormons cul ilustradôr Luigino Peressini che al tabaiarà di leture dal teritori, un viaç sul nestri teritori cu la ricercje da lis tradizions, il dissen e la scriture creative. Da ultin si rivarà al I.C. di Lucinîs ai 11 di Avrîl cu la dotore Ada Bier de Universitât Ca’ Foscari che e tabaiarà di cemût doprâ lis ICT (Information Communication Technology) tal insegnament da lis lenghis. I seminaris a son vierts a ducj chei che a àn plasê di partecipâ e a son ricognossûts pe formazion dai insegnants daûr lis liniis vuide MIUR 2016-2019.

© Voce Isontina 2019 - Riproduzione riservata
Gurize in prin plan par la Fieste de Patrie dal Friûl
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.