Cultura
stampa

Cent agns di culture pal nestri Friûl

Iniziativis in dute la Patrie, e no dome, pal grant inovâl da la Filologjiche

Parole chiave: Friûl (21), Filologjiche (1)
Cent agns di culture pal nestri Friûl

Cent agns pal Friûl, un secul a pro da la lenghe, da la culture e da la indentitât dai furlans.
Cheste, e cetant di plui, e je la Societât Filologjiche Furlane, che e vierzarà a Udin ai 5 e ai 6 di Otubar lis celebrazions pal prin secul di vite e di ativitât.
La Filologjiche, nassude a Guriza e che a Guriza e fasarà fieste dilunc dal mês di Novembar (viodi l’articul chi in bande), e je stade fondade par intuizion di Ugo Pellis e di Bindo Chiurlo. Propit intune letare che Chiurlo al mandà a Pellis cualchi setemane prin da la assemblee costitutive dai 23 di Novembar 1919, si capìs la ambizion di cheste istituzion culturâl: "La Societât e à di jessi sei une academie di studiôs e cultôrs, ma tal stes timp ancje une clape ch’e tignedi dongje furlans di ogni bande".
Cemût che al scrîf il president Federico Vicario tal so salût al Centenari "La Societât Filologjiche Furlane e je une comunitât di personis ch’a àn crodût e ch’a continuin a crodi ai valôrs da la nestre tiere, a la ereditât storiche e culturâl dal popul furlan, un popul fi di Aquilee e fradi dai popui d’Europe".
Par memoreâ chest impuartant inovâl si à intindût fâ lis robis in grant: dongje da la  cunvigne dai 5 e dal congrès sociâl dai 6 di Otubar (che si fasaran a Udin daûr dal program che o ripuartìn tal articul chi sot), a son in program cetantis presentazions dal numar unic Friûl - doi volums par cure di Andrea Tilatti - che nus conte la storie di un secul di Filologjiche e da lis personalitâts che a àn contribuît a fâle cressi. Une opare che e cjape dentri i contribûts di trentecinc autôrs che a àn scrit di aspiets storics, etnoantropologjics, gjeografics, lenghistics e artistics dal Friûl dai ultins cent agns, cjalâts dal pont di viste dai interès e da la ativitât dal nestri Istitût.
Il prin incuintri di presentazion al sarà martars ai 29 di Otubar a lis sîs sotsere a Rome inte sede di rapresentance da la regjon FVJ; si larà indevant joibe ai 31 di Otubar a lis sîs e mieze sore sere inte Vile de Claricini Dornpacher a Butinins di Muimans, po a Milan, sabide ai 9 di Novembar li dal convent dai fraris servîts, a Viene ai 5 di Dicembar ospits dal Istitût talian di Culture e par finî a San Vît dal Tiliment, in palaç Rota, ai 7 di Dicembar.
Vie pal mês di Otubar a Aquilee si presentarà il "Strolic dai Strolics", la antologjie di un secul di Strolic furlan rincurade di Dani Pagnucco e a Pordenon, sabide ai 26 inte biblioteche civiche, si fevelarà invezit dal gnûf sît internet che al conten il catalic da lis rivistis furlanis.
Si larà ancje a Tumieç cu la seconde repliche (la prime e sarà al teatri Verdi di Guriza ai 16 di Novembar) dal conciert dal Centenari, par cure da la orchestre sinfoniche e da la corâl dal Conservatori "Jacopo Tomadini" di Udin: tal teatri Candoni ai 18 di Novembar.
Pai plui piçui, dai 18 di Novembar ai 13 di Dicembar in diviers lûcs dal Friûl si davuelzarà Fruts, la tierce edizion dal festival da la leteradure pe infanzie che chest an al varà par teme I colôrs de storie.
Nol mancjarà ancje un apontament istituzionâl a Triest inte sede dal Consei regjonâl ai 21 di Novembar cu la scree da la mostre dai dissens di Vera De Tina, La nestre Int.
Il dì dopo, ai 22 di Novembar in Palaç Mantica a Udin, al vignarà presentât il IX volum dal Atlant lenghistic talian, par cure dai ricercjadôrs da la Universitât di Turin che a van indenant tes ricercjis inviadis tai agns vincj dal Nûfcent dal nestri grant lenghist Ugo Pellis.
Il Centenari si sierarà ai 20 di Dicembar, simpri in Palaç Mantica a Udin, cu la presentazion di "Cent agns di culture pal nestri Friûl", il numar speciâl pal centenari da la riviste "Sot la Nape".

© Voce Isontina 2019 - Riproduzione riservata
Cent agns di culture pal nestri Friûl
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.