Cultura
stampa

Art tes glesiis e monuments dal Friûl

Guidartefvg.it, il gnûf sît internet realizât da la Deputazion di Storie Patrie pal Friûl

Art tes glesiis e monuments dal Friûl

Tal 2004 la Deputazion di Storie Patrie pal Friûl e publiche une golaine di vuidis facilis, aprofondidis dal pont di viste sientific e sioris di fotografiis, che a fevelin dai plui impuartants edificis da lis provinciis di Udin e di Pordenon (glesiis, bibliotechis, palaçs, museus): fin cumò a son vignûts fûr plui di 80 volumuts.
Une iniziative nassude stant che une da lis carateristichis che a clamin di plui la int a visitâ il Friûl e je la straordenarie ricjece di monuments d’art sparniçâts pal teritori, dispès in localitâts minôrs e dentri di edificis - massime di glesiis - che difûr a somein puaris o bandonadis, ma che salacor dentri a custodissin da lis veris oparis mestris. Oparis che a contin la storie di une civiltât che e à savût rivâ a pontis di ecelence e che a son lis testemoneancis di ats di amôr sincîrs pe bielece e la fede cristiane. Un patrimoni di grant interès, ma no simpri vonde cognossût ni valorizât come ch’al mertarès. Di fat, in plui dai monuments plui cognossûts, dentri di tantis piçulis glesiis, salacor periferichis e trascuradis, o podìn cjatâ maraveôs afrescs medievâi, intais rinassimentâi, pituris dal Sietcent, decorazions Liberty e Decò. Dai tesaurs vêrs e propris, che salacor no cognossin avonde nancje i esperts, e che a mertin di jessi preseâts e gjoldûts di bande dal public.
Par slargjâ il plui pussibil chestis cognossincis, i contignûts da lis vuidis a son stâts metûts sul web e al è nassûts, in gracie da la poie di PromoTurismoFVG, il sît internet www.guidartefvg.it. Chest parcè che dal sigûr in Regjon, ma ancje a nivel nazionâl, fin cumò al mancjave un imprest avonde aprofondît par dâ al visitadôr potenziâl une largje schirie di notiziis storic-artistichis, risultâts di ricercjis sientifichis pal plui ineditis, ma cuntun lengaç che ducj a puedin capî e massime chei turiscj che a vegnin cun curiositât a visitâ il nestri teritori. Cussì, dongje di monuments za cognossûts (come il domo di Udin, chel di Cividât o la badie di Rosacis, inte foto), o cjatìn ancje lûcs mancul frecuentâts, come la glesie dai Batûts a San Vît dal Tiliment o la glesie di Versute. Guidartefvg.it al met duncje in vitrine localitâts piçulis e grandis, parcè che lis oparis di interès a son custodis ancje dentri di edificis che di fûr no somein di grant valôr. Dut chest al fâs part da la bielece da la ricercje e da la scuvierte, e si pues cjatâlu propit zirant sul sît metût a pont da la Deputazion furlane.
Il sît, otimizât sedi par computer sedi par smartphone, al podarà deventâ ancje un jutori di marketing pal turisim regjonâl, ancje pe presince di mapis e la possibilitât di elaborâ percors tematics, in plui di  jessi un imprest che al rint plui semplice la visite ai edificis, cun spiegazions claris e aprofondidis, fotografiis di cualitât e risoluzion altissimis che sul schermi dal computer a vegnin fûr in dute la lôr bielece e su chel dal telefonut a judin il visitadôr a movisi sul puest jenfri altârs e absidis. Cun di plui, il turist-viazadôr, in gracie da la modalitât di ricercje, al podarà meti adun par cont so percors personalizâts su lis olmis di un particolâr autôr, di une iconografie o di une ete storiche.
Cun chest imprest al devente duncje plui facil scuvierzi lis tantis nestris bielecis artistichis, che a puedin dal sigûr clamâ in Friûl cetancj turiscj, curiôs di cognossi une storie e une civiltât che no ’nd àn di compagnis.

© Voce Isontina 2019 - Riproduzione riservata
Art tes glesiis e monuments dal Friûl
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.