Cultura
stampa

1915, lis vôs da la stampe jenfri pâs e vuere

Progjet par scandaiâ gjornâi e sfueis dal Friûl talian e Litorâl austriac

Parole chiave: Friûl di Jevât (1), friulano (11)
1915, lis vôs da la stampe jenfri pâs e vuere

Il 1915, un an jenfri pâs e vuere. Ce si spietavisi, tal Friûl talian e tal Litôral austriac, e di ce si vevial timôr, se la vuere si fos slargjade? La publicistiche regjonâl vevie caratars siei propris rispiet a chê nazionâl taliane o autriache? Si rindevisi cont che il Friûl e il Litorâl a saressin stâts cjapâts dentri da la vuere e che a saressin rivâts sdrumaments e disgraciis, come sucedût l’an prin sui fronts ocidentâl e orientâl? A chestis domandis al vûl rispuindi il progjet 1915. Tra pace e guerra nella stampa e nella pubblicistica nel Friuli italiano e nel Litorale Austriaco, promovût da la Societât Filologjiche Furlane in parie cu la Deputazion di Storie Patrie pal Friûl, l’ICM - Istitût pai Incuintris Culturâi Miteleuropeans e l’ISSR - Istitût di Storie Sociâl e Religjose di Guriza.
L’obietîf al è scandaiâ la publicistiche (stampe periodiche e rivistis) vignude fûr te zone dal Litorâl austriac e dal Friûl talian te prime metât dal 1915. Ancje se in timp di vuere la censure e meteve limits a ogni manifestazion publiche dal pinsîr, la stampe e ufrìs une largje schirie di leturis da la sene socio-politiche locâl e internazionâl in chei mês cetant dificii prin che l’Italie e jentràs in vuere. Si podaran duncje scandaiâ lis diferentis posizions de opinion publiche locâl, che no jere clare e univoche come che si pues pensâ.
Stant che a vuê al mancje un studi che al cjali la stampe periodiche e la publicistiche locâl dal 1915 tal so complès e tal detai, il progjet al propon di lâ insot inte analisi dai diviers câs editoriâi cuntun voli comparatîf e analitic, par podê ricognossi i procès di costruzion e condizionament da l’opinion publiche, che cence dubi a vegnin fûr ben a clâr, e la schirie di posizions politichis e ideolo-gjichis che a jerin in chest teritori, par sô nature cetant miscliçât e che dal sigûr no si pues capî doprant une sole clâf di leture.
A son trê i moments di lavôr metûts in cont par chest progjet, che al sarà coordenât dal professôr Fulvio Salimbeni e al cjaparà dentri une scuadre di sîs ricercjadôrs. Intun prin moment a vignaran individuadis lis fonts publicistichis (gjornâi e rivistis) che a saran ogjet dal studi: publicazions diferentis par lenghe (talian, todesc, sloven) e par orientament politic (catolic, liberâl, socialist, cu lis variants nazionâls presintis).
Il secont al sarà il moment di analisi da lis diviersis testadis e formis di publicistiche nassudis te zone di riferiment tal cors dal 1915: chest scandai al fasarà vignî fûr lis posizions cjapadis di ogni gjornâl o sfuei rivuart il probleme, in chel moment ancjemò dome politic, da la vuere sclopade in Europe e che in curt e varès cjapât dentri ancje l’Italie. I risultâts a vignaran presentâts infin intune cunvigne - che la Societât Filologjiche e intint organizâ a Guriza dentri da la prossime Setemane de culture furlane in Mai dal an cu ven - e a saran racuelts e publicâts intun volum che, pe prime volte, al permetarà une leture articolade da la publicistiche buride fûr in regjon tal 1915. Ma nol è vonde. Progjets di cheste fate no puedin no vê un fin educatîf e par chest a àn di jessi fats cognossi ai plui zovins. A chest pro si intint presentâ ai students dai istitûts comprensîfs e da lis scuelis superiôrs dal Friûl Vignesie Julie i contignûts da la ricercje che, cun riflessions e considerazions adatadis a l’etât e al grât di studi dai arlêfs, ur fasaran capî ce che e je stade la prime vuere mondiâl inte nestre regjon, intune prospetive di educazion ai valôrs da la pâs e da la concuardie tra popui che di simpri a vivin dongje un cun chel altri.

© Voce Isontina 2019 - Riproduzione riservata
1915, lis vôs da la stampe jenfri pâs e vuere
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.